កាលថ្ងៃទី១១-១៥ ខែសីហា​ ឆ្នាំ២០២៤ កន្លងទៅ ដោយទទួលបានឱកាសអនុញ្ញាតពី ឯកឧត្តម ឡុង ណារ៉ូ ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយក​នៃរដ្ឋាករទឹកស្វយ័តក្រុងភ្នំពេញ, លោក សំអូន សិរីសុមនុ ប្រធាននាយកដ្ឋានស្រាវជ្រាវ និងអភិវឌ្ឍន៍ នៃរដ្ឋាករទឹកស្វយ័តក្រុងភ្នំពេញ ត្រូវបាន International Water Association អញ្ជើញចូលរួមប្រកួតប្រជែងក្នុងកម្មវិធី 2024 Recognition Program of the Climate Smart Utilities Initiative នៅទីក្រុងតូរុនតូ ប្រទេសកាណាដា ក្នុងវេទិកាទឹកស្អាតពិភពលោក​ (World Water Congress) ដែលរៀបចំដោយ International Water Association។

     រដ្ឋាករទឹកស្វយ័តក្រុងភ្នំពេញ ក្រោមការដឹកនាំរបស់ ឯកឧត្តម ឡុង ណារ៉ូ បានសម្រេចបានជោគជ័យ ដ៏មានមោទនភាពមួយទៀត នៅក្នុងវេទិកាទឹកស្អាតពិភពលោកអន្តរជាតិ (IWA) ដោយត្រូវបានជ្រើសរើស និងទទួលស្គាល់លក្ខណៈអន្តរជាតិ ជាអង្គភាព Most Inspiring and Recognition ក្នុងចំណោមបណ្តា ១៦អង្គភាពទឹកស្អាតនិងអនាម័យ ទូទាំងពិភពលោក តាមរយៈការបង្ហាញអំពីវិធានការណ៍ ផែនការយុទ្ធសាស្ត្រ និងវឌ្ឍនភាពនៃការអភិវឌ្ឍន៍អង្គភាពទឹកស្អាតក្នុងក្របខណ្ឌ Climate Smart Journey ក្រោមសសរស្តម្ភទាំង៣ Adaptation, Mitigation & Leadership សម្រាប់ការគ្រប់គ្រងទឹកប្រកបដោយនិរន្តភាព និងប្រកបដោយភាពច្នៃប្រឌិត។

     រដ្ឋាករទឹកស្វយ័តក្រុងភ្នំពេញ មានមោទនភាព និងកិត្តិយសទទួលបានវិញ្ញាបនបត្រទទួលស្គាល់អំពីកិច្ចខិតខំប្រឹងប្រែង ក្នុងការអនុវត្តផែនការយុទ្ធសាស្ត្រ Climate Smart ដែលមិនត្រឹមតែលើកកម្ពស់សេវាកម្មទឹកស្អាតរបស់យើងប៉ុណ្ណោះទេ ប៉ុន្តែថែមទាំងរួមចំណែកដល់ភាពធន់នឹងបរិស្ថាន-ការបម្រែបម្រួលអាកាសធាតុផងដែរ។ ការទទួលស្គាល់នេះ គឺជាសក្ខីភាពមួយ ចំពោះការយកចិត្តទុកដាក់របស់យើង សម្រាប់ការអភិវឌ្ឍន៍ឆ្ពោះទៅមុខប្រកបដោយនិរន្តរភាពសម្រាប់យើងទាំងអស់គ្នា។